Plantun de Prouvènço

Pèr coumpara dos planto d'encò nostre

Parietaria officinalis & Myosotis laxa

Parietaria officinalis

Urticaceae

Nom en français : Pariétaire officinale.

Descripcioun :
Aquesto espargoulo, Parietaria officinalis, que trachis souto li bos proche d'aigo (ripilsivo) es estado de tèms counfoundudo emé l'espargoulo que vèn dins li paret, l'erbo-de-paret, Parietaria judaica. Pamens èi bèn mai grando dins tóuti si partido, majamen si fueio proun longo e acabado pèr un tros fin. Coumpara emé l'espargoulo que ié sèmblo.

Usanço :
Estènt mai raro, sèmblo pas que siegue estado utilisado en Prouvènço au contro de Parietaria judaica que devrié pourta soun noum. Pamens a li mémis usanço que sa cousino. De nouta que douno mens d'alergìo.

Port : Grando erbo
Taio : 40 à 80 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Parietaria
Famiho : Urticaceae

Ordre : Rosales

Coulour de la flour : Blanco
Petalo : 5
Ø (o loungour) flour : 0,5 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à avoust

Liò : Ribiero - Bos umide
Estànci : Coulinen à Mountagnard
Couroulougi : Éurasiatico
Ref. sc. : Parietaria officinalis L., 1753

Te-vese-e-t'ame(-fourro-bourro)

Myosotis laxa

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis gazonnant.

Descripcioun :
Aquéu te-vese-e-t'ame, pulèu rare, trachis en ribo de ribiero, dins li prado umido e li roubino de palun. Emé si péu contro li sepalo se destrìo dis aùtri Myosotis di flour pas trop grosso. Tambèn, i'a ges de bratèio dins l'enflourejado e lou "calice" crèis proun après la flourido.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").